小編有個由細到大住長洲的朋友，佢成日都呻逢星期六日，長洲就會變得人山人海。無辦法啦，香港土地面積不大但人口就非常稠密，真係連想搵個遠離煩囂的地方hea吓都有難度。梅窩無長洲、南丫島咁多遊客，就算星期日嚟到都覺人煙稀少，空氣零舍清新。
其實放假唔一定要安排好多節目，去離島散下步、望下海，食碗超有滿足感的檬粉就已經舒壓不少。 
津津食店是梅窩人氣食店之一，招牌蕃茄蟹檬得星期日供應，數量有限，賣完就無，大部份的梅窩居民都知道有幾好食。小店地方不大，經常爆棚，幸好有戶外露天座位，曬著陽光嘆返碗檬粉勁寫意。
蟹檬一上檯就香到不得了，大大件蟹肉，仲有啲用嚟煲湯底的豬肉，非常新鮮美味！而且大大份，絕不欺場，食完成個人超有滿足感。當日小編大概下午三點左右嚟到津津食店，大概半小時後就賣完了，所以建議大家早少少嚟。
另外，鍾意食辣的朋友可以挑戰一下越式順化辣雞檬，辣得嚟好過癮，小編仲叫咗杯咸檸梳打解解渴。由於食量有限無試到第三款蕃茄牛腩檬，聽聞蕃茄湯底一樣咁香濃，牛腩仲勁腍。宜家諗起呢三碗檬粉都想搭轉船入梅窩食呀。
備註：小店僅限星期日限定供應三款湯檬（蕃茄蟹檬、順化辣雞檬和蕃茄牛腩檬），唔好睇錯日子呀！
津津食店（地址：大嶼山鄉事會路35號地下）
