Home 香港玩樂 【假日遊車河好去處】精選5個靚景值得去嘅遊車河打卡點!

【假日遊車河好去處】精選5個靚景值得去嘅遊車河打卡點!

1929

假日趁好天,遊車河真係一個唔錯嘅選擇
至於去邊好? 小編就悉心揀左幾個景色唔錯又可以打卡影相嘅地方介紹
*有時放假去呢D熱門地方反而仲多人過旺角,大家記得出發前睇好交通先決定!

第一個:泥涌石灘

泥涌位於馬鞍山同西貢中間既西沙路位置,距離石灘五分鐘就到
係西沙茶座附近既西沙路有一個大型既泊車錶位,泊車地點相對黎講都多同埋近
講起泥涌石灘最出名一定係天空之鏡 有唔少人都為左影相而黎
感受大自然嘅同時又影到靚相 無論係同家人定係情侶都一樣適合

如何前往泥涌石灘?

駕車前往西沙路泥涌停車場,落車地點行到灘邊只需要五分鐘,一啲都唔難去!

第二個:粉嶺流水響

除左「香港天空之鏡」,唔知大家又有無聽過「香港小桂林」呢?
呢個流水響水塘就稱得上「香港小桂林」喇,一齊睇呢個小桂林有幾靚先

如何前往粉嶺流水響?

粉嶺聯和墟出發 → 流水響水塘
注意流水響水塘外面無任何泊人車錶位,水塘入口兩邊馬路只可以容納到大約兩架車
所以建議如果泊車最好去鶴藪水塘停車埸,然後落車再步行15-20分鐘到流水響水塘

 

第三個:鹿頸

鹿頸附近泊車地點多,都係一個車聚嘅選擇,所以泊車大致上都唔洗擔心
通常行入去影靚相同感受大自然之前都會係外面嘅茶座食下嘢 chill下先!
另外旁邊仲有個釣魚場(金門海水漁場),場內可以泊車仲有燒烤爐比大家即場燒海鮮食
至於鹿頸行去谷埔嘅景色真係一流 大家千祈唔好錯過

如何前往鹿頸?

大多數人都會由大埔作為起點
大埔起點 → 大美督 → 新娘潭路 → 鹿頸 → 粉嶺終點

 

第四個 : 西九文化區


如果唔想攀山涉水近近地都有選擇架,就係呢排好熱門嘅西九文化區
西九文化區坐落維多利亞港海旁,除左有戲曲中心、藝術公園、M+展亭及海濱長廊
有時仲會舉行各項文化藝術活動和節目,外面有空曠嘅草地可以帶寵物散步或者野餐都一流
另外,仲有單車服務,價錢都只係每小時$20。有嘢玩有嘢睇當然唔少得食
附近有數間餐廳比你揀,食下午茶飲咖啡chill下真係好爽!一樣可以打卡影生活照

如何前往西九文化區?


西九文化區位於維多利亞港海旁,有三個停車場非常方便
分別係戲曲中心停車場、藝術公園(E區)停車場、項目辦公室停車場
有三個停車場咁多就唔洗地方泊車啦!

 

第五個 :數碼港

最後介紹多一個近市區嘅地方而又方便嘅,就係數碼港
呢個地方相信好多人都聽過,不過唔知又有冇去過呢?
香港可以帶寵物散步嘅地方真係唔多,而數碼港就係其中一個可以帶寵物嘅公園
一大遍草地比佢地任跑,仲可以慢慢享受下野餐,同狗狗影下靚相
而且呢度泊車方便,行幾步已經到公園。
海濱公園右面仲有個商場,有餐廳同超市,途中想補給一下都可以呢!

如何前往數碼港?

 

揸車非常方便!泊車點有兩個,第一個就係海濱長廊門口既兩小時錶位
大約有20個以上 ,而另一個點就係數碼港商場,錶位會比較方便狗主上落!

放假去下郊外地方心情都輕鬆啲,享受同家人/伴侶嘅相處時光真係非常珍貴
不過始終都係大自然,大家要好好保護環境,唔好遺留垃圾記得要自己清理好啊!
大家有無其他去過又覺得靚嘅地方可以介紹下呢?不坊可以同大家分享下

 

【遊車河好去處】精選幾個揸車先會去 而又唔算好多人嘅地方同餐廳