話說今年2019年剛剛開始，想真係落手再來多一個儲錢大計，用月供儲股方式，定期買入高息股，長年累月咁收藏，希望可以儲到錢同埋有穩定股息收入。今次就將我最近做過既資料搜集做一個整理分享。
點解會想買收息股？
話說其實我買左股票都有一段時間，當中上上落落，有時又要花心機操作，但個回報竟然不及乖乖地坐定定買823領展多年來的賺價賺息。每次見到股價好慢，每年又只得3%股息，但長年累月來，年回報都好穩定。
而而家又踏入30，想投資組合更加穩健，又有回報，又可以抵得上風浪的，於是就想趁2019年開始，重新建立一個自己的儲錢收息組合。
收息股點揀？有咩目標？
其實呢個投資組合都唔係好高要求，希望每年都可以有5%回報。而個組合是可以抵抗到經濟上落，以5-10年計都能夠保持穩定的。
Filter左最後呢5隻都可以考慮，由呢日起就再慢慢日日睇：
第一隻：領展房產基金 823
領展佔左全港屋村商場，年年改裝加征，又年年有息派，仲要每年都加派息。雖然有機會遇上樓市波動，但民生商場較多，抵抗能力高。
不過就可惜價錢已太過，唯有再看看有無機會岩位入。
第二隻：港燈－ＳＳ 2638
一隻朋友推介的穩陣公用收息股，現價$8.12息率有近5%。2014年由電能分拆，要求已列明將利潤扣除開支後100%分派，多年來都好穩陣，而股價更加由$5來到最近$8
第三隻：冠君產業信託 2778
呢一隻即係朗豪坊既房託，由鷹君41分拆出來。呢一隻就比較簡單易明，都係得2個主要物業，就係花園道甲級商廈同埋朗豪坊。一路都派息穩定。
好處係簡單易明，我又自細住太子旺角，對商場較熟識。 不過風險就係佢地有爭產事件，同埋兩個收租物業都係同商業有關，假如經濟起落大，對商場，租戶影響都有的。
第四隻：九龍建業34
呢一隻係香港蚊型地產，起左幾個納米盤出來都比人講。不過主要就係Keep住有7%股息，同埋太子始創就係旗艦物業。
好處就係7%件股息，唔好處就係股價太穩定，長期未必再有複合增長。
第五隻：工商銀行1398
內銀一向都係收息之選，雖然一直都有5%股息，但可惜股價長期太平癮，而市值已很大，好難再有得上。加上中美貿易戰，風眼可能在金融體系，銀行有可能受打擊，都係考慮因素。
不過睇返過去10年，工行都有一個大既橫行區，如果可以的話，$4-5買多D，$6-7就減一減，都可以有多20%。
數住咁多先，再有就加。
同埋之後揀左邊隻就再update。
