佬假期自從於2017年寫過教學文章同埋YouTube影片，教大家如何在大陸開銀行戶口，再連接微信錢包同支付寶後，一路以來都成為熱門，長於最Top位置，至今已儲了超過20萬文章閱讀及13萬影片觀看！
唔少傳聞都話香港人在大陸開銀行戶口，又要稅單、要大陸地址等等，但其實唔一定。唔少人跟佬假期既資料，都順利開到銀行戶口。不過，由於資料已有好幾個月，我地怕資料有漏有改，加上不時都有唔少讀者，在出發前Inbox跟我地查詢，以確保唔會白行一轉。經我地整合後，得最以下呢5大最常見既開戶口問題，一齊睇下：
香港人返深圳開銀行戶口 最常見的五大問題！
第一條常見問題：
大陸開銀行戶口政策有無改變？
而家仲開唔開到？
大陸政策的確係周不時都會改，而且大陸咁多間銀行，再加上每一間銀行唔同分店既要求都有所不同，真係無可能可以追得好貼。不過我地去開果一間國貿工商銀行，由當日出文出文一刻到而家，政策仍然一樣 – 香港人不用大陸地址都開到。
簡單整理一下，開戶所需的資料：（2019年4月Confirmed!）
出發開戶前記得帶齊文件：
1）回鄉證，香港身份證
2）實名認證嘅大陸手機號碼 （呢篇文有教）
3）香港地址證明 (3個月有效就得-銀行月結電子版印出來都得 )
4）附助證件：車牌/學生證/香港護照 （帶護照最方便）
5）第一次開戶，銀行方面建議最少帶定$3000人仔現金去，同埋要Keep一個月，之後就可以轉出來用，唔係手續費來的
*而第一次開戶，又想即開即用的話，建議$3000之外多帶多少少錢
咁就可以了
關於將來會唔會變方面，呢層唔駛擔心，因為我地加咗國貿工行職員嘅WeChat，如果有咩變動都第一時間收到風既
*有讀者考察報告：
隨了國貿工行之外，華強北振華路果間工行
都一樣不用稅單同大陸地址都可以開到戶口
第二條常見問題：
大陸實名認證電話方面 –
香港上台既一卡兩號得唔得？
大陸開銀行戶口，就一定要有一個實名認證既手機號碼。除左去大陸上台開一個號碼之外，喺香港出一個一卡兩號都可以的。 最重要就係「實名上台」同有「內地嘅電話號碼」，未必一定要聽到電話，但就要一定收到由大陸Send出黎既SMS。
至於有咩一卡兩號好，聽部份佬讀者分享，原來而家香港嘅中X動有個大灣區月費Plan，用香港Plan之外再加$18就可以有埋內地嘅電話號碼，最最最好既就係有1GB上網，如果人在大陸的話係當香港漫遊上網咁可以用到Whatapp、IG、FB等香港人常用嘅平台，無懼防火牆添。
總結：
大陸電話號碼有2個方法：
1）大陸親自上台
2）香港既一卡兩號Plan
第三條常見問題：
點解一定要放$3000入銀行戶口?
國貿工行其中一個開戶要求就係要$3000人仔先開到，唔少人見到都問點解咁多？如果無又得唔得？
其實唔少大陸銀行真係要有內地住址先可以開到戶口，我地估國貿工行唔需要地址但轉成開戶要$3000，用意係確保戶口真實，同埋想方便大家第一次入多啲，之後就不用成日都入錢。而呢$3000都唔係費用來，只係需要存放1個月後就可以再用返，而之後最低存款要求係$300。
所以開戶是需要帶$3000去，而假如想開完戶後即日用到，就建議帶多幾百蚊去，咁就一部份用來存放，一部份可以即時用。
第四條常見問題：
要整幾耐？建議預先下載定呢3個App就快一步開到戶口
開戶口整個流程要幾耐，其實好睇係星期幾同幾時去。
如果唔計排隊，到你開始的話就大概20分鐘整完。如果係平日12點前去，由入門口到整好大概30分鐘搞掂。但星期六日多人時，有機會要1-2個鐘先整好。
而為左縮短時間，同埋避免人在大陸無得上網，而銀行Wi-Fi又勁慢之下，建議可以於出發前預先下載呢3個必定用到既App，但唔使打開住，到時開戶就用得著，唔使去到先下載咁煩。
第一個App：中国工商银行 (itunes link)
第二個App：融e生活-深圳工行移动金融生活圈 (itune links)
第三個App：手機錢包 – 可以係微信或者支付寶 (支付實就係大陸版，而微信就確保係最新版本就可以了)
第五條常見問題：
香港wechathk可以大陸比錢
而家中銀香港都開到大陸戶口
點解仲要去深圳開戶口？
其實要用到手機錢包，的確除左自己去大陸開戶口外，已經越來越多方法都可以搏得返大陸手機錢包。但經比較過後，都係認為去深圳開戶口開方便化算，原因係
1）只有大連鎖用到wechathk 大陸仍有千千萬萬間用唔到wechathk
香港版wechat pay雖然在大陸既大連鎖有過萬間店可以用到，但大陸仍有千千萬萬間都用唔到。
當離開深圳或者經的士／小店，而你又用緊香港版WeChat pay，店員好大機會係唔知咩來同未必收到你錢既，到時如果你又無帶夠現金人仔，就唔夠錢比又用唔到手機比錢了
2）關於香港銀行開既大陸戶口，我地睇過下條款，佢地基本上要你先開一個香港既銀行戶口，到你做左客戶後，先可以再開多個大陸版戶口接通兩邊。但情況係香港銀行戶口既最低結存，一般都多過大陸既要求，如果行少一轉大陸開戶，但要額外Keep多一個數(5位數起vs $300)，就個人恆量了。
另外就係速度效率，香港呢邊銀行開既大陸戶口，係要一月左右先開到，仲要審批。而如果在大陸開戶口，由入去到開完用得，係即日內完成！
總結呢兩個情況，雖然香港呢邊都越來越多方法用到大陸手機錢包，但有一個大陸銀行戶口可能都係較為方便既方案。
