Home 香港玩樂 【秋高氣爽去行山】 3大超簡單入門級行山路線推介

【秋高氣爽去行山】 3大超簡單入門級行山路線推介

115

前排佬小編一直好想行下山,不過天氣好熱又焗,令我打消左呢個念頭,不過依家秋高氣爽天氣涼涼地,終於唔會痴笠笠,真係好岩一家大細一齊去野餐、郊遊啦。今次推介三個超級簡單嘅行山路線比大家,一齊親親大自然啦!

龍脊
佬小編最愛嘅行山路徑係龍脊,因為佢算係好容易行,而且沿途風景好靚。原來旅遊書《孤獨星球》曾經都認為龍脊係香港最佳遠行路線之一。行上龍脊,可以見到遠處壯麗嘅海景,藍天碧水真係可以令心情好放鬆,再行上啲,去到打爛埕頂山,仲可以俯瞰石澳、大浪灣、東龍島一帶地區。經過龍脊觀景台,再向下行一千級石階,就會到達大浪灣。如果一早出發,仲可以預留多啲時間係大浪灣沙灘曬下太陽呢!

 

大潭水塘

大潭水塘建於1883-1917年期間,解決左當時香港飲用水不足嘅問題。可以由黃泥涌水塘做為起點,經過陽明山莊之後,就會進入大潭水塘群的範圍。係行山過程之中,會見到大風坳涼亭,再向下行會見到柏架山道,係康柏郊遊徑,再轉入鰂魚涌樹木研習徑,就會見到戶外公共爐灶。原來爐灶係1930年代用黎對付日軍嘅設施,好有歷史意義呢!

 

城門郊野公園

城門郊野公園係一個打卡熱點,受到好多網紅、攝影愛好者嘅歡迎。入面有菠蘿壩自然教育徑,呢條路好輕鬆,可以欣賞水塘風景,邊會見到好多馬騮呢!城門郊野公園仲有白千層同賞蝶園,岩晒大家去影相。不過要記住唔好餵馬騮同捉蝴蝶,要好好保護生態環境!

 

最後,希望大家係營營役役嘅生活環境之中,都可以出戶外吸收下新鮮空氣。

REF:http://www.discoverhongkong.com/tc/see-do/great-outdoors/hikes/index.jsp