三里屯個名聽落有少少老套，但係唔講唔知，原來佢係北京係非常出名，仲係北京第一條酒吧街，想去北京過一個難忘嘅夜生活，咁就一定要去三里屯啦！唔通佢同中環蘭桂坊一樣咁狂野熱鬧？
三里屯咁愛歡迎，同佢嘅地理位置有好大嘅關係。三里屯屬於商業區，附近都有外國使館，都因為咁而有好多外國人去幫襯，入面有好多唔同類型嘅酒吧，主要係有live band 嘅酒吧為主，如果去旅行嘅時候想體驗下夜生活，又或者想飲酒輕鬆下，好推介大家去三里屯搵間合適嘅酒吧好好享受下。
大陸依家好興講「夜間經濟」依個詞語，即係下午6點－凌晨6點嘅經濟活動，目的係激發年輕人消費力。除左有大量酒吧，三里屯入面仲有大型購物中心，成為左時尚品牌集中地，所以無論日頭定夜晚，都人來人往好熱鬧。三里屯Village係北京最大嘅商場，入面有多過200間鋪頭，Village建築物都好有特色，係由八個出名設計師共同合作設計，真係好有時代感，岩晒年輕朋友去打卡。
三里屯係北京最出名嘅酒吧街，不過近年竟然加入文青風嘅書店。例如三聯韜奮書店，入面好有文藝氣息，夜晚都有唔少人係入面睇書、飲咖啡，似乎同出面燈紅酒綠嘅酒吧街有好大分別。如果去北京失眠嘅話，夜晚都可以有個好好嘅地方睇書同梳理心情。
三里屯依個地方好神奇，集酒吧街同書店於一身，正正可以打造屬於北京嘅時尚感，獨一無二嘅三里屯既適合小酌一杯，又適合悠閒睇書。
希望大家係北京可以過一個難忘嘅夜生活。
地址：中國北京市朝陽區三里屯路11號及19號
交通情況：地鐵10號線「團結湖站」西行，
110,120,403,823,117,118工人體育場下；
113,115,406,416,431,701,758三里屯下
